یہ کس نے کہہ دیا تم سے عذابِ زندگی ہے

یہ کس نے کہہ دیا تم سے عذابِ زندگی ہے کہ تلخی امتحانوں کی شرابِ زندگی ہے

گریزاں اس سے رہنا اجتنابِ زندگی ہے محبّت جس کو کہتے ہیں، نصابِ زندگی ہے

تمہاری یاد میں رہتا ہوں گم، میں نے سنا ہے کسی کی یاد میں کھونا ثوابِ زندگی ہے

نہیں آساں پسِ منظر اگرچہ دیکھ لینا اجل میری نظر میں اک حجابِ زندگی ہے

ہےترکِ شاعری تو ترکِ دنیا سے عبارت سُخن گوئی ہماری آب و تابِ زندگی ہے

یہ دنیا جس کو کہتی ہے کسی مجذوب کی بڑ ہماری خود کلامی احتسابِ زندگی ہے

چٹانوں سے جو ٹکراتی ہے ساحل کی طلب میں وہی اک موجِ ہستی اضطرابِ زندگی ہے

جسے دل پڑھتے رہنا چاہتا ہے زندگی بھر اسی کی ذات بس اشعؔر کتابِ زندگی ہے