بس ایک آرزو دل سے لگائے پھرتا ہوں

بس ایک آرزو دل سے لگائے پھرتا ہوں تمہارے خواب کی گٹھری اُٹھائے پھرتا ہوں

زمانہ تاکہ نہ پہنچے مسائلِ دل تک لبوں پہ اپنے تبسّم سجائے پھرتا ہوں

اسی لیے کہ کوئی دل کو دشت کہہ نہ سکے تمہاری یادوں کی دنیا بسائے پھرتا ہوں

کسی کے پاس بھی درماں نہیں ہے تیرے سوا مرض یہ کیسا میں جاں سے لگائے پھرتا ہوں

نہ پوچھو کس طرح دنیا کی تیز نظروں سے میں اپنے دامنِ تر کو چھپائے پھرتا ہوں

بس اس لیے کہ ترا قصّہ معتبر ہوجائے کہاں میں اپنی کہانی سنائے پھرتا ہوں

تمہاری خوشبو سے دنیا مہک نہ جائے کہیں تمہارے ساتھ کی یادیں بھُلائے پھرتا ہوں

یہ حق تمہارا ہے جاناں ملو تو نذر کروں تمہارے نام جو آنسو بچائے پھرتا ہوں

میں بے وفاؤں کے صحرا میں ہر جگہ اشعؔر تری وفاؤں کی فصلیں اُگائے پھرتا ہوں