تمہارا درد اگر میرے آس پاس رہے

تمہارا درد اگر میرے آس پاس رہے دل ِدریدہ پہ مرہم کا اک لباس رہے

وہ سنگ رکھتا ہے اپنے جگر میں خوئے گلاب تمہارے دستِ حنائی کی جس میں باس رہے

زباں پہ شام و سحر اک انا کا پہرہ ہے لبوں پہ کیسے کوئی حرَفِ التماس رہے

ہمیں تو نشہء تابِ نظر بہت تھا مگر اُٹھی وہ آنکھ تو قائم نہ پھر حواس رہے

حُدودِ شوق کا وعدہ ہے ان سے آج کی شب زباں کا اے دلِ سرکش تجھے بھی پاس رہے

وہ کیا ملا کہ کوئی بات ہی نہ ہوپائی نہ اس کے ہوش، نہ قائم مرے حواس رہے

مذاق لگتی ہیں سب شہرتیں مجھے اشعؔر مکینِ دل ہی اگر میرا ناشناس رہے