کون سا لمحہ تھا جب وہ راحتِ جاں ہوگئے

کون سا لمحہ تھا جب وہ راحتِ جاں ہوگئے ہم نہ جانے کس ادا پر ان کی قرباں ہوگئے

مجھ کو رسوا کرنے والی وحشتوں کا شکریہ جن کے دم سے امتحانِ عشق آساں ہوگئے

جن سے امّید ضرر تھی وہ عدو نظروں میں تھے بے خبر تھا دوستوں سے، دشمنِ جاں ہوگئے

تذکرہ شعر و سُخن کا یوں ہے بس اپنے یہاں جب بھی آمد ہوگئی کارِ نمایاں ہوگئے

جن سےکوئی خواب وابستہ نہ تھا میرا کبھی زندگی میں دفعتاً آکر رگِ جاں ہوگئے

بھول جاتا ہے زمانہ جلد ہر طوفاں کے بعد وجہِ قہرِ آسماں قوموں کے عِصیان ہوگئے

دونوں ہی شرمندہ ہیں ہم اک انا کی ذات سے کتنے موسم زندگی کے نذرِ ہِجَراں ہوگئے

تاکہ محفل آپ کی رنجیدۂ خاطر نہ ہو اشک میرے شاملِ جشنِ چراغاں ہوگئے

یاد آتی ہیں ہمیں صحرا کی خود نایابیاں شہرِ یخ بستہ میں کیا آئے کہ ارزاں ہوگئے

زندگی میں آج میری کتنے ہی خوابوں کے بعد خیر سے شرمندۂ تعبیر ارماں ہوگئے

مسند و دستار والے مضمحل رہتے تھے سب اشعؔرِ عاجز کا اُٹھنا تھا کہ فرحاں ہوگئے